Día do TEA (Trastorno do Espectro do Autismo)

Este venres 6 decoramos o colexio con globos azuis para dar visibilidade ao Trastorno do Espectro do Autismo. Cada familia recibiu o manifesto para informar sobre esta conmemoración e agradecémosvos a vosa colaboración con globos azuis. Aquí tedes unhas imaxes do colexio nesta data.

In tempore sueborum e paseo polo Sil

Hoxe viaxamos a Ourense para asistir á exposición In tempore sueborum. Pinchando no enlace podedes acceder á información sobre esta exposición. 

Ademais tivemos a sorte de ver unha exposición de maquetas de trens. 

Pola tarde paseamos en barco polo Sil, principal afluente do río Miño.

Aquí tedes unhas imaxes deste estupendo día de excursión.

Escola de Familias do Concello de Bueu

O vindeiro xoves 19 ás 20h na Sala Amalia Domínguez Búa (frente á praza de abastos), terá lugar a charla interactiva "Establecemento de normas e límites". Están convidadas a participar todas as familias dos centros educativos de Bueu. 

Para asistir é necesario inscribirse no formulario que lle entregamos ao alumnado e devolvelo cuberto á maior brevidade posible no colexio. Deixámosvos aquí tamén un modelo.

Accede ao formulario. 

22 de marzo - DÍA MUNDIAL DA AUGA

O 22 de marzo fixemos a nosa celebración do DÍA MUNDIAL DA AUGA. É unha data moi importante este curso para nós que estamos a traballar sobre a auga. Lemos o noso decálogo para o coidado da auga, cantamos a canción "Agua es" e inauguramos a exposición de auga de diferentes zonas. Queredes saber de onde conseguimos traer auga? De moitísimos lugares:

- Auga das fontes: Fontenova, Tomadelo, Hermelo, Lameiro, Regueira (Cangas), Abilleira (Bueu),  Fonte de Aldán, Vilar, Laxes, Río Rosa, Ramal dos Galos (Bueu), Sobalo, Foxo da Ameixoada (Moaña), Sanamedio, Valado (Bueu), Sar, Mogor (Marín), Socatelo, Montemogos, Fonte do Cura (Bueu), Fonte Fría (Cela)

- Auga das praias: Areas de Bon, A Roiba, Cunchosa, Portocelo (Marín), Tuia, Ancoradouro, Loureiro, Beluso.

- Auga dos ríos: Orxas (Aldán), Bispo (Bueu), Lameira (Marín), Inferno (Cela).

- Auga dos regatos: Figueirón e Ouril.

- Auga dos lavadoiros: lavadoiro do Peón e lavadoiro de Laxes.

- Auga dos lagos: Lago de Brazas e Lago Mansiño.

- Auga de moitos outros lugares: manantial dos montes de Ardán, porto de Bueu, pozo, chuvia, piscina.

Aquí tedes unhas imaxes da exposición e da nosa conmemoración do Día da Auga.

Obradoiro "Orientándonos no mar" no Museo Massó

Dentro do Club de Lectura "Vinte mil leguas de viaxe baixo o mar", o alumnado de 6º participou nunha visita guiada ao Museo Massó e no obradoiro "Orientándonos no mar" onde cada alumna e alumno fixo o seu cuadrante, un instrumento moi útil para a navegación.

Unha imaxe durante a proxección do audiovisual sobre a Batalla de Rande.

Unha imaxe durante o obradoiro de orientación martíma.

A función estelar dos magos de 4º

Para rematar a semana, o alumnado de 4º realizou unha exhibición de trucos de maxia para o alumnado de Infantil, 1º e 2º. Foron moitísimos os aplausos que recibiron e o certo é que nos deixaron abraiados con cada un dos trucos.

Día da Muller

O día da muller, as mulleres do Obradoiro de Memoria da Casa do Pobo de Beluso xunto á psicóloga Sonia Ricoy, estiveron co alumnado de Infantil e Primaria contándolle as súas vivencias coa auga cando elas eran novas.
Resultou moi interesante e emocionante escoitalas falar dos baldes de auga, de poñer a roupa ao clareo, de ir buscar auga ao río, de como se bañaban daquela...
Estámoslle moi agradecidas a elas e a Sonia Ricoy por compartir connosco as súas experiencias e quedan as portas abertas para recibilas sempre que queran volver á escola.